«ەكى تاراپ بويىنشا كەلىسسوزدەر ءالى ءجۇرىپ جاتىر. جەكپە-جەك ۋاقىتىن 6 قازانعا جوسپارلاپ وتىرمىز. الداعى جوسپاردا ءتورت كەزدەسۋ بار. كونور, توني فەرگيۋسون, سەن-پەر جانە جارتىلاي ورتا سالماق چەمپيونىمەن», دەدى ا.نۋرماگومەدوۆ.
وسىعان دەيىن حابيب نۋرماگومەدوۆ 6 قازاندا جەكپە-جەك وتكىزەتىنى تۋرالى ايتىپ قالعان بولاتىن. ول بۇل كەزدەسۋدە ءساۋىر ايىندا امەريكالىق سپورتشى ەل ياكۆينتادان جەڭىپ العان چەمپيوندىق بەلدىگىن قورعايتىن بولادى.
فەدەرەر 98-جەڭىسىنە قول جەتكىزدى
شۆەيتساريالىق تەننيسشى رودجەر فەدەرەر شتۋتگارتتا وتكەن تۋرنيردە جەڭىمپاز اتاندى. فينالدىق سايىستا فەدەرەر كانادالىق ميلوش راونيچپەن كەزدەسىپ, 6:4, 7:6 ەسەبىمەن جەڭىسكە جەتتى.
بۇل 36 جاستاعى فەدەرەردىڭ مانسابىنداعى 98-ءشى, ال وسى ماۋسىمداعى ءۇشىنشى جەڭىسى. ول وسى جىلدىڭ اقپان ايىندا 2012 جىلدان بەرى ءبىرىنشى رەت الەمدىك تەننيس رەيتينگىسىندە ءبىرىنشى ورىنعا كوتەرىلىپ, اتر تاريحىندا ءبىرىنشى ورىنعا شىققان جاسى ەڭ ۇلكەن (36 جاس 6 اي) تەننيسشى اتاندى.
رودجەر بيىلعى رەيتينگىدە 7 اپتا بويى ءبىرىنشى ورىننان تۇسكەن جوق. ول ەڭ العاش 2004 جىلى رەيتينگىدە العاشقى ورىنعا شىعىپ, 309 اپتا بويى ءوز ورنىن ەشكىمگە بەرگەن جوق ەدى.
رەسەيگە تراكتورمەن كەلدى
گەرمانيالىق قارت فۋتبول جانكۇيەرى گۋربەرت ۆيرت رەسەيدە ءوتىپ جاتقان فۋتبولدان الەم چەمپيوناتىن تاماشالاۋ ءۇشىن تراكتورمەن كەلگەن.
ۆيرت گەرمانيانىڭ فورححايم قالاسىنان ماسكەۋگە دەيىنگى ارالىقتاعى 2,5 مىڭ شاقىرىم جولدى ءجۇرىپ وتكەن. ول مىنگەن تراكتور 1936 جىلى قۇراستىرىلعان. «رەسەي جولدارىندا ەشقانداي كەلەڭسىزدىككە تاپ كەلگەن جوقپىن. جول بويى تەك بەس مارتە عانا جول پوليتسياسى توقتاتتى. ونىڭ بىرەۋى ەستەلىك سۋرەتكە ءتۇسۋ ءۇشىن», دەيدى ۆيرت.
جەكسەنبى كۇنى الەم چەمپيوناتىنىڭ «F» توبىنداعى گەرمانيا – مەكسيكا كەزدەسۋى ماسكەۋدەگى «لۋجنيكي» ستاديونىندا ءوتىپ, مەكسيكالىق فۋتبولشىلار 1:0 ەسەبىمەن جەڭىسكە جەتكەن بولاتىن. ويىن الدىندا ماسكەۋ قالاسىنىڭ سپورت جانە تۋريزم دەپارتامەنتىنىڭ باسشىسى نيكولاي گۋلياەۆ ۆيرتكە گەرمانيا-مەكسيكا ماتچىنا بيلەت بەردى.
دايىنداعان
ءالي بيتورە,
«ەگەمەن قازاقستان»
